Tá Comhairle Cathrach na Gaillimhe ag glacadh le hiarratais anois ar chiste Pobail um Ghníomhú ar son na hAeráide do ghrúpaí pobail chun a n-astaíochtaí gás ceaptha teasa a laghdú agus chun cabhrú leis an gCathair a dhícharbónú. Tacóidh an cistiú le tionscadail bheaga (suas le €20,000), meánacha (€21,000-€50,000), agus tionscadail ar mhórscála (€51,000-€100,000) i gcúig phríomhréimse: fuinneamh Comhphobail; taisteal; bia agus dramhaíl; siopadóireacht agus athchúrsáil; agus gníomhaíocht áitiúil ar son na haeráide agus an chomhshaoil.
Dúirt Méara Cathrach na Gaillimhe, an Clr. Mike Cubbard, “Is é an t-athrú aeráide an dúshlán is suntasaí do gach pobal i gCathair na Gaillimhe. Fáiltím roimh an gciste nua seo mar chéim thábhachtach bhreise chun ár spriocanna do 2030 a bhaint amach agus chun dul chun cinn a dhéanamh i dtreo Cathair na Gaillimhe a bheidh neodrach ó thaobh na haeráide de faoi 2050 i gcomhréir le spriocanna an Phlean um Ghníomhú ar son na hAeráide in Éirinn.”
Ag labhairt dó faoin gciste, dúirt Leonard Cleary Príomhfheidhmeannach Chomhairle Cathrach na Gaillimhe, “Is deontas fáilte é seo do ghrúpaí pobail a bhfuil súil acu páirt a ghlacadh chun dul i ngleic leis an athrú aeráide. Tá iarfheistiú, painéil ghréine, gairdíní pobail, plandáil crann, páirceáil rothar agus tionscadail aeráide nuálacha i measc na samplaí den mhéid ar féidir iarratas a dhéanamh orthu leis an deontas seo.”
I measc na ngrúpaí incháilithe tá carthanachtaí áitiúla, ionaid phobail, grúpaí áitiúla comhshaoil, clubanna spóirt agus fiontair shóisialta. Sula ndéanfaidh siad iarratas, moltar go láidir do ghrúpaí teagmháil a dhéanamh le hOifigeach Gníomhaíochta Pobail ar son na hAeráide de chuid Chomhairle Cathrach na Gaillimhe chun a gcuid smaointe a phlé ag 091 536 400 nó Climate@GalwayCity.ie
Tá iarratais oscailte ar líne anois, féach www.GalwayCity.ie/CommunityClimateActionFund
Is é an Aoine, an 12 Nollaig 2025 ag 5pm an spriocdháta le hiarratas a dhéanamh.