Tá fáilte curtha ag Comhairle Cathrach na Gaillimhe roimh mhéadú mór ar mhaoiniú don Chlár Fáltas Dara Láimhe Tithíochta Sóisialta, rud a chuirfidh ar chumas na Comhairle níos mó tithe a sholáthar dóibh siúd a bhfuil géarghá acu leo.
Tar éis feachtas maoinithe rathúil faoi stiúir an Aire James Browne, tá sé deimhnithe ag an Roinn Tithíochta, Rialtais Áitiúil agus Oidhreachta go bhfuil €50 milliún breise curtha ar fáil go náisiúnta don chlár.
Leithdháileadh €8 milliún ar Chomhairle Cathrach na Gaillimhe faoin scéim do 2025. Tá 19 dteach faighte ag Comhairle Cathrach na Gaillimhe go dtí seo i 2025 agus tá roinnt aonad eile á bhfiosrú.
Tá an €50 milliún breise chun tús áite a thabhairt do thithíocht don dream atá gan dídean, chun tacú le tionscnaimh Tithíocht ar dTús agus tionscnaimh chun imeacht ón easpa dídine.
Údaraíodh d’údaráis áitiúla freisin gealltanais mhaoiniúcháin a dhéanamh le haghaidh éadálacha a d’fhéadfadh dúnadh i 2026, agus ceadaíodh do Chomhairle Cathrach na Gaillimhe suas le €2.4 milliún - 30% dá buiséad bunaidh do 2025 a ghealladh.
D’athdhearbhaigh an Chomhairle a tiomantas don scéim Tionóntaí in Situ, atá fós oscailte agus a úsáidtear mar rogha dheireanach chun tionóntaí atá le díshealbhú gan aon locht orthu féin a chosc.
Dúirt Méara Chathair na Gaillimhe, an Comhairleoir Mike Cubbard:
“Léirítear leis an infheistíocht seo an t-aitheantas atá tugtha ag an Rialtas do na riachtanais phráinneacha tithíochta i gcathracha ar nós chathair na Gaillimhe. Tá freagracht orainn a chinntiú go n-úsáidtear gach euro go héifeachtach chun tithe slán sábháilte a chur ar fáil don dream is mó a dteastaíonn sé uathu. Molaim foireann tithíochta na Comhairle as a dtiomantas agus táim ag tnúth leis an tionchar dearfach a bheidh aige sin ar ár bpobail a fheiceáil.”
Chuir Leonard Cleary, Príomhfheidhmeannach Chomhairle Cathrach na Gaillimhe fáilte roimh an bhfógra freisin:
“Tacaíonn an maoiniú feabhsaithe seo lenár straitéis níos leithne chun Gaillimh a shuíomh mar chathair ionchuimsitheach ina bhfuil deiseanna ar fáil. Trí infheistíocht a dhéanamh i dtithíocht shóisialta, ní hamháin go bhfuil muid ag tabhairt aghaidh ar riachtanais láithreacha, tá pobail níos láidre a bhfuil níos mó teacht aniar iontu á dtógáil freisin. Leanfaimid orainn ag obair go dlúth leis an Roinn chun a chinntiú go mbeidh torthaí fiúntacha ar an gclár seo do mhuintir na Gaillimhe.”
Dúirt Elizabeth Fanning, Stiúrthóir Seirbhísí, Comhairle Cathrach na Gaillimhe:
“Is céim ríthábhachtach chun tosaigh é an méadú seo ar mhaoiniú inár n-iarrachtaí tacú le teaghlaigh leochaileacha i nGaillimh. Cuireann sé ar ár gcumas leanúint de thithe a fháil agus de bheith tiomanta don scéim Tionóntaí in Situ, a bhfuil ról ríthábhachtach aici maidir le cosc a chur ar easpa dídine do thionóntaí a bhfuil orthu dul i ngleic le díshealbhú gan aon locht a bheith orthu féin.”