D’fhógair Comhairle Cathrach na Gaillimhe ceapachán triúr Oifigeach Forbartha Uirbí agus Pobail inniu chun tacaíocht spriocdhírithe a thabhairt do ghrúpaí pobail agus deonacha sa gCathair. Tacóidh na róil cheannródaíocha seo le forbairt agus cumasú pobal áitiúil, ag obair le cónaitheoirí, grúpaí pobail, agus páirtithe leasmhara eile chun tionscnaimh forbartha a chur i bhfeidhm, agus chun aontacht pobail a fheabhsú.
D’fháiltigh Méara Chathair na Gaillimhe, an Comhairleoir Mike Cubbard roimh na ceapacháin, ag rá, “Tá ríméad orm ceapachán triúr Oifigeach Forbartha Uirbí agus Pobail a fheiceáil chun tacú leis na heagraíochtaí pobail inár gcathair - na hoibrithe deonacha agus na grúpaí pobail arb iad croílár ceart ár gcuid pobal iad. Tá earnáil phoiblí bhríomhar agus ghníomhach i gCathair na Gaillimhe, idir chumainn áitritheoirí, eagraíochtaí spóirt, ghrúpaí comhshaoil agus ghairdíní pobail. Nasc iontach a bheidh san acmhainn thiomnaithe seo idir na grúpaí pobail agus an t-údarás áitiúil, agus cabhróidh sí le grúpaí forbairt agus bláthú le tacaíocht ón údarás áitiúil”.
Beidh Oifigeach Forbartha Uirbí agus Pobail tiomnaithe ag gach toghlimistéar áitiúil (LEA) sa chathair (Iarthar, Lár, Oirthear), agus beidh freagrachtaí téamacha agus cláir ag na hOifigigh a bheidh dírithe ar an gCathair ar fad, amhail a bheith ag obair go dlúth le grúpaí agus eagraíochtaí a thacaíonn le daoine fásta níos sine, grúpaí eitneacha mionlaigh, daoine óga, daoine faoi mhíchumas agus pobail LADT+.
Dúirt Príomhfheidhmeannach Chomhairle Cathrach na Gaillimhe, Leonard Cleary, “Mar aitheantas ar an ról ollmhór a bhí ag oibrithe deonacha i bhforbairt na cathrach, d’aontaigh na Comhaltaí Tofa agus an Feidhmeannas an acmhainn nua seo mar chuid dár dtosaíochtaí straitéise. Tá na róil maoinithe ag an gCáin Mhaoine Áitiúil mar ath-infheistíocht chun tacú le sócmhainní daoine i bpobail áitiúla. Táim ag tnúth leis an earnáil phoiblí a fheiceáil ag fás agus ag forbairt leis an tacaíocht sin, agus táim ag súil leis na caidrimh níos láidre agus leis an idirphlé agus rannpháirtíocht leanúnach a éascófar leis na róil sin.”
Dúirt an Stiúrthóir Seirbhísí, Derek Pender, “Is ar Chomhairle Cathrach na Gaillimhe atá an phríomhfhreagracht as forbairt eacnamaíoch, shóisialta agus pobail a stiúradh sa gcathair, mar chuid den Phlean Áitiúil Eacnamaíochta agus Pobail (LECP). Tacóidh na róil nua sin leis an bplean, agus le tionscnaimh eile, a thabhairt chun críche, trí chaidrimh láidre a fhorbairt idir Comhairle Cathrach na Gaillimhe agus baill an phobail, grúpaí áitiúla agus páirtithe leasmhara. Leagtar amach an ról forbartha pobail sin i gcomhthéacs fhás agus fhorbairt ár gcathrach ina háit agus ina pobal uirbeach nua.”
Rinne an tOifigeach Feidhmiúcháin Sinsearach agus Ceann Feidhme, Forbairt Pobail, Dermot Mahon cur síos ar róil na nOifigeach Forbartha Uirbí agus Pobail nua, ag rá, “Beidh oifigeach tiomnaithe ag gach toghlimistéar áitiúil ag obair go dlúth le pobail ina gceantar, chun go mbeidh siad in ann rochtain a fháil ar mhaoiniú agus ar thacaíocht ón údarás áitiúil. Díreoidh an fhoireann ar rannpháirtíocht an phobail; cláir a fhorbairt agus a chur i bhfeidhm; forbairt acmhainní grúpaí pobail; abhcóideacht agus cumhachtú don earnáil pobail agus dheonach; slógadh acmhainní d’eagraíochtaí pobail; agus tuairisciú agus doiciméadú a dhéanamh ar an tionchar a bhíonn ag obair na ngrúpaí pobail inár gcathair. Táimid ag tnúth le bheith ag obair níos dlúithe le heagraíochtaí pobail agus deonacha, chun an ról a fhorbairt agus chun a chinntiú go ndíreofar ar acmhainní sna háiteanna is mó a bhfuil gá leo.”
Is iad seo a leanas an triúr Oifigeach Forbartha Uirbí agus Pobail (UCDO) nua:
- Toghlimistéar Áitiúil an Oirthir: Oliver Lydon
- An Toghlimistéar Áitiúil Láir: Natalie Coen
- Toghlimistéar Áitiúil an Iarthair: Deirdre Keaney Cunningham
Beidh an fhoireann mar chuid den Rannóg Forbartha Pobail, agus tacóidh siad le rannpháirtíocht tras-stiúrthóireachta le grúpaí pobail.
Beidh na hOifigigh Forbartha Uirbí agus Pobail amuigh ar an talamh ina bpobail sna seachtainí amach romhainn, ag cur aithne ar a bpobail. Freastalóidh siad freisin ar an gcruinniú den Choiste Ceantair Áitiúil i mí Meán Fómhair, chun iad féin a chur in aithne go foirmiúil do Chomhaltaí Tofa agus chun cur i láthair a dhéanamh ar an ról nua. Déanfaidh na hOifigigh Forbartha Uirbí agus Pobail cur i láthair do Choiste Forbartha Áitiúil agus Pobail Chathair na Gaillimhe i mí Meán Fómhair 2025.
Chun tuilleadh eolais agus sonraí teagmhála na nOifigeach Forbartha Uirbí agus Pobail a fháil, féach suíomh gréasáin Chomhairle Cathrach na Gaillimhe - www.GalwayCity.ie