Tá cuairt toscaireachta Comhchathrach 2026 go Chicago oscailte go hoifigiúil ag Comhairle Cathrach na Gaillimhe le fáiltiú ag Teach na hÉireann faoi stiúir an Chonsail Ghinearálta Pádraig Manning. Ba thús le clár trí lá a bhí san ócáid a bhí dírithe ar naisc shibhialta, chultúir, oideachais agus eacnamaíocha a neartú idir Gaillimh agus Chicago.
Labhair an Méara ar Chathair na Gaillimhe, an Clr Helen Ogbu leis an dream a bhí i láthair agus chuir sí a buíochas in iúl dóibh as an bhfáilte chroíúil a cuireadh roimh an toscaireacht. Leag sí béim ar an gceangal láidir stairiúil agus cultúir atá idir an dá chathair, agus luaigh sí na luachanna comhroinnte atá ag an dá chathair maidir le himirce, pobal agus deiseanna.
“Tá an oíche anocht, agus mé i mo sheasamh anseo i mo Mhéara ar Chathair na Gaillimhe, thar a bheith tábhachtach dom,” a dúirt sí. “Tuigeann muintir Chicago níos fearr ná dream ar bith eile ar domhan cumhacht na himirce, an phobail agus na deise. Mhúnlaigh na luachanna sin an chathair seo, agus múnlaíonn siad Gaillimh sa lá atá inniu ann.”
Thug an Méara aitheantas d’obair Choiste na gComhchathrach, lena n-áirítear na Comhchathaoirligh Nuala Kavanagh agus John Wrenn, agus na hionadaithe Maya agus Karissa ó Chicago Sister Cities International. Thug sí aitheantas freisin do chomhairleoirí Chathair agus Chontae na Gaillimhe a thaistil mar chuid den toscaireacht.
Áirítear mar chuid de thoscaireacht na Gaillimhe ionadaithe ó Chumann Tráchtála na Gaillimhe, Ollscoil na Gaillimhe, Ollscoil Teicneolaíochta an Atlantaigh, Ardán 94, Gaillimh le Gaeilge, Institiúid Theicniúil na Gaillimhe, agus Biúró Coinbhinsiúin na Gaillimhe. Léiríonn a rannpháirtíocht an raon leathan comhoibrithe atá ar siúl idir an dá chathair.
Dúirt an Méara go bhfuil an chuairt seo dírithe go mór ar fhoghlaim ó na dea-chleachtas a chuirtear i bhfeidhm i Chicago agus Milwaukee, comhpháirtíochtaí a neartú, agus doirse nua a oscailt do mhuintir, do mhic léinn, do ghnólachtaí agus d’eagraíochtaí cultúir na Gaillimhe.
Glacfaidh an toscaireacht páirt i sraith imeachtaí sna laethanta amach romhainn, lena n-áirítear cruinnithe eolais eacnamaíocha, cruinnithe forbartha óige, imeachtaí cultúir, agus plé cathartha.