Is ábhar mórtais do Chomhairle Cathrach na Gaillimhe comhpháirtíocht pobail nua a fhógairt le Eimear Greaney as UpSew chun Caifé Deisiúcháin míosúil a sheoladh. Beidh an tionscnamh seo á reáchtáil i gClub Rámhaíochta na Gaillimhe agus beidh sé ina bhunchloch don thionscadal ‘Cathair Chiorclach na Gaillimhe’, a cuireadh le chéile chun aghaidh a thabhairt ar chur amú teicstílí agus na scileanna chun fad a chur le saolré earraí a chur ar fáil do dhaoine. Is féidir freastal ar an gCaifé Deisiúcháin saor in aisce - díreach buail isteach leis na hearraí a theastaíonn uait a dheisiú. Seiceáil ‘Repair_Cafe_Galway’ ar Instagram chun uaireanta oscailte agus dátaí an Chaifé Deisiúcháin mhíosúil a fháil.
Tá seoladh an Chaifé Deisiúcháin an-tráthúil tar éis do Alan Dillon TD, an tAire Stáit ar a bhfuil freagracht as Fostaíocht, Gnóthais Bheaga agus Miondíol, an chéad Ráiteas Beartais Náisiúnta ar Theicstílí a fhoilsiú le gairid. Léiríonn an beartas cinniúnach seo athrú mór ó thaobh cuntasachta agus sainordaítear nach mór do sholáthraithe agus do mhiondíoltóirí an costas iomlán a mhaoiniú chun éadaí agus teicstílí úsáidte a bhailiú agus a bhainistiú faoi mhí Aibreáin 2028. Fanfaidh Comhairle Cathrach na Gaillimhe agus UpSew chun tosaigh trí na moil deisithe seo a bhunú anois - tríd an mbonneagar áitiúil a thógail agus an cultúr athúsáidte is gá a chothú chun freastal ar na riachtanais náisiúnta seo atá ag teacht chun cinn agus aistriú ón tsamhail “tóg-déan-cur amú”.
Ó 2018 i leith, d’ardaigh tomhaltas teicstílí na hÉireann go mór ó 20.3kg go 53kg an duine sa bhliain. Tharla an t-ardú sin den chuid is mó mar gheall ar an méid fáis atá tagtha ar ultra-mhearfhaisean ó ardáin dhomhanda ar nós Shein agus Temu.
Dúirt Eimear Greaney, bunaitheoir UpSew, “Cuireadh tús le UpSew in 2014 mar go bhfaca mé go raibh na siopaí carthanais áitiúla ag iompú isteach ina bpróiseálaithe teicstílí neamhoifigiúla, ar chaillteanas airgid go minic, de bharr an méid ollmhór éadaí a bhí á gcaitheamh amach. Táimid ag díriú ar dheisiú agus ar athúsáid le hos cionn deich mbliana. Is athrú nádúrtha iad na caiféanna míosúla seo - spás ina féidir le daoine oilte agus fiosracha bualadh lena chéile agus earraí a choinneáil amach as an líonadh talún.”
Cé gur faoi bheith deisiú é Caifé Deisiúcháin na Gaillimhe, is faoin bpobal freisin é. Ag oibrithe deonacha atá an caifé á rith go hiomlán agus cuireann sé spás fáilteach ar fáil inar féidir le cuairteoirí earraí a thabhairt leo chun iad a dheisiú le cúnamh ó oibrí deonach, i bpróiseas ina bhfuiltear ag oibriú i gcomhar agus ag roinnt scileanna.
Tá an Caifé Deisiúcháin leagtha amach ar bhealach neamhfhoirmeálta agus inrochtana. Más “réiteach tapa” atá ó na cónaitheoirí nó má tá siad ag iarraidh buneolas a fháil ar an uaschúrsáil, is féidir sin a dhéanamh go héasca le himeacht “buail isteach” den chineál seo.
Chomh maith le bheith ag deisiú, bíonn bord ceardaíochta míosúil á reáchtáil ag an gcaifé inar féidir le daoine a bheith ag obair ar a dtionscadal féin nó bualadh isteach le haghaidh comhrá. I mí an Mhárta agus i mí Aibreáin, beidh Galway IT MeetUp sa Chaifé d’imeacht Suiteála Linux - bealach praiticiúil chun cur le saolré ríomhairí glúine atá fós ag úsáid Windows 10.
Dúirt Eimear Greaney, “Ós rud é go bhfuil Caiféanna Deisiúcháin fréamhaithe sa phobal, thosaíomar féilire poiblí ar leathanach Instagram Repair_Cafe_Galway ar a bhfuil liosta de na himeachtaí áitiúla saor in aisce a bheidh ag tarlú le fáil go héasca in áit amháin. Agus an aimsir ag éirí níos fliche, níos gaofaire agus níos teo, agus líon neamh-inbhuanaithe earraí á gcur amú againn, tá sé d’aidhm againn athrú i dtreo an athúsáid, an chruthaitheacht agus an athléimneacht phoiblí a spreagadh - agus comhráití níos éasca agus níos stuama a bheith againn faoi ghníomhú ar son na haeráide agus an méid is féidir le pobail a dhéanamh le chéile.”
Is éard a dúirt Fergal Cushen, Oifigeach Feasachta Comhshaoil Chomhairle Cathrach na Gaillimhe: “Tá ríméad orainn tacú le Caiféanna Deisiúcháin rialta i gCathair na Gaillimhe. Sásaíonn siad an oiread sin spriocanna atáimid ag iarraidh a bhaint amach mar chathair inbhuanaithe atá freagrach ó thaobh na timpeallachta de. Cothaíonn an ghné neamhfhoirmeálta caidreamh pobail ríthábhachtach agus cuireann sé scileanna deisithe ar fáil saor in aisce do ghrúpaí éagsúla ar fud na Gaillimhe.”
Tacaíonn Comhairle Cathrach na Gaillimhe, ina Seaimpín Spriocanna Forbartha Inbhuanaithe (SFI), leis an tionscnamh atá nasctha le roinnt príomhspriocanna domhanda:
- SFI 11 (Cathracha agus Pobail Inbhuanaithe): Spásanna ionchuimsitheacha áitiúla a chothú le haghaidh nascacht pobail.
- SFI 12 (Tomhaltas agus Táirgeadh Freagrach): Geilleagar ciorclach a chur chun cinn trí dhramhaíl a laghdú.
- SFI 13 (Gníomhú ar son na hAeráide): Astaíochtaí carbóin a bhaineann le déantúsaíocht agus iompar táirgí nua a laghdú.
Sonraí an Imeachta
- Áit: Club Rámhaíochta na Gaillimhe, Barr an Chalaidh, Gaillimh.
- Minicíocht: Míosúil - Seiceáil Repair_Cafe_Galway ar Instagram le haghaidh dátaí
- Costas: Saor in aisce